Visita cun classas da scola
La via da furmaziun dals giuvenils è marcada da decisiuns e pussaivladads. Cun visitar l'exposiziun da professiuns survegnan ils giuvenils durant tschintg dis ina survista cumplessiva da la vasta purschida da professiuns cun emprendissadi en il Grischun. "Empruvar sezzas e sezs" è qua il motto. Als stans preschentan las emprendistas ed ils emprendists lur lavurs professiunalas da mintgadi ed ils giuvenils pon s'infurmar a moda cumplessiva ed era gia empruvar ora ina u l'autra chaussa.
Classas dal stgalim superiur e da las purschidas da furmaziun transitorica en il Grischun
Tut las classas da scola dal stgalim superiur e da las furmaziuns transitoricas en il Grischun èn envidadas da visitar l'exposiziun da professiuns. Ils custs da viadi cun il traffic public ed ils custs per mangiar e baiver al lieu surpiglia l'organisatura sin annunzia. L'annunzia è pussaivla fin ils 25 da settember 2026. Cun s'annunziar online datti la pussaivladad da tscherner ina fanestra da temp per la visita. Questas fanestras da temp èn limitadas e vegnan attribuidas tenor la successiun da las annunzias. En cas da dumondas davart l'annunzia da classas da scola dal stgalim superiur e da furmaziuns transitoricas As drizzai per plaschair a la cussegliaziun da professiun, da studi e da carriera, tel. 081 257 27 72 u bslb@afb.gr.ch.
Ulteriuras classas da scola
L'exposiziun da professiuns è er adattada per classas da scola da la 5avla e 6avla scola primara e da las scolas medias. Persunas d'instrucziun interessadas da questas classas pon s'annunziar tar l'organisatura (info@fiutscher.ch, 081 257 03 23)
Materialias da preparaziun
Per sa preparar sin la visita da l'exposiziun da professiuns han las organisaturas ed ils organisaturs elavurà materialias d'instrucziun ensemen cun Magistraglia Grischun. Igl è era recumandabel da far ordavant cun las scolaras ed ils scolars il check d'interess. Quel pon ins far online u cun il flyer che tut las classas da scola annunziadas han survegnì.
