Exposiziun grischuna da professiuns
Fiutscher, l'exposiziun grischuna da professiuns, permetta durant tschintg dis da scuvrir il mund professiunal en il Grischun. L'exposiziun vegn organisada mintga dus onns ed ha lieu dals 12 – 16 da november 2025 gia per l'otgavla giada en la Halla da la citad da Cuira. 89 exposituras ed expositurs preschentan sin ina surfatscha da passa 5000 m2 184 professiuns da la furmaziun fundamentala e 312 purschidas da perfecziunament. L'exposiziun da professiuns duai er en l'avegnir esser in lieu ideal per scuvrir la furmaziun professiunala en la pratica. Da mesemna fin venderdi han tut las classas da scola dal stgalim superiur e las 5avlas e 6avlas classas dal stgalim primar dal chantun Grischun la pussaivladad da visitar l'exposiziun. La fin d'emna è ideala per famiglias e creschids che vulan sa laschar inspirar da las pussaivladads da la furmaziun fundamentala e da perfecziunament.
Fiutscher explore
Fiutscher explore pussibilitescha da scuvrir las professiuns cun emprendissadi che vegnan offertas en il Grischun. Qua chatt'ins er ils manaschis d'emprendissadi ch'èn registrads sin la plattafurma LENA. Pliras professiuns pon gia vegnir scuvertas a moda multimediala: per mintga professiun datti ina vista da 360 grads dal lieu da lavur, in clip d'exploraziun, diversas fotografias ed in purtret. La purschida vegn amplifitgada cuntinuadamain. Manaschis d'emprendissadi, associaziuns professiunalas ed expositur:as da la fiera grischuna da professiuns Fiutscher pon laschar realisar da l'Uniun svizra d'artisanadi e mastergn ulteriuras producziuns da cuntegns multimedials.
Fiutscher live
Durant l'exposiziun grischuna da professiuns Fiutscher vegnan registradas sco program accumpagnant diversas emissiuns live davart la tscherna da la professiun e la furmaziun professiunala. Questas registraziuns televisivas stattan silsuenter a disposiziun a las scolaras ed als scolars, a las persunas d'instrucziun ed als geniturs.
Fiutscher inside
Emprendistas ed emprendists da differentas professiuns da l'entir chantun Grischun preschentan «lur emprendissadis» en las medias socialas. Ils giuvenils partan lur mintgadi da lavur en ils profils da Fiutscher sin Instagram e TikTok. Els èn privat activs en las medias socialas e pon uschia colliar lur hobi cun lur furmaziun professiunala. La campagna è vegnida realisada gia duas giadas cun success.
